Golfariz a través de catro miradas
Exposición fotográfica do roteiro do 20 de setembro de 2026
O pasado 20 de setembro celebramos unha nova edición do roteiro fotográfico de Golfariz, unha proposta para achegarnos a este lugar desde a fotografía, pero tamén desde a súa historia, o seu patrimonio e a contorna natural.
Ao longo da xornada, combinamos explicacións e indicacións técnicas con tempo para practicar, observar os detalles e experimentar con diferentes maneiras de fotografar o que tiñamos diante. As catro persoas participantes compartiron unha mañá amena e produtiva, na que houbo espazo para aprender, descubrir e, por suposto, gozar do percorrido.
.
.
.
.
Para rematar, propúxenlles un pequeno exercicio: escoller unha fotografía realizada durante o roteiro que lle ensinarían a alguén que nunca estivese en Golfariz. Unha imaxe que, dalgunha maneira, lle permitise descubrir o lugar e facerse unha idea do que pode atopar nel.
O resultado son catro fotografías e catro interpretacións diferentes. Porque, aínda que percorremos o mesmo espazo, cada persoa observa, selecciona e conta o que ve á súa maneira.
Catro fotografías, catro maneiras de descubrir Golfariz
Moncho
«Escollín unha foto onde reflicte a integración da natureza, curso de auga e vexetación, coa intervención humana cun sendeiro e un muíño.»
Outras fotos de Moncho...
.
.
.
.
.
.
Unha relación entre natureza e intervención humana
A selección de Moncho combina vistas dos muíños e doutros elementos construídos con detalles da auga e da vexetación. Nunha das fotografías incorpora tamén a presenza dunha persoa que fotografía a contorna, achegando unha dimensión humana ao percorrido. As imaxes permiten apreciar tanto os elementos individuais como a súa integración no lugar.
Fotografías realizadas con cámara bridge.
Ángel
«Calquera foto que fixen ten o seu significado pero talvez esa é como abrir a porta para descubrir o encanto do lugar.
Penso que cada un ten o seu xeito de ver e interpretar a fotografía e que ás veces un detalle insignificante pode ser relevante e expresar moito.»
Outras fotos de Ángel...
.
.
.
.
.
.
Unha visión variada dos elementos do lugar
A selección de Ángel percorre distintos elementos de Golfariz: os muíños e as construcións de pedra, os camiños, a auga e as formas da vexetación. Combina vistas máis abertas con detalles e texturas, ofrecendo unha visión variada do lugar e dos elementos que o caracterizan.
Fotografías realizadas con smartphone.
Sesé
«Escollín esta foto porque creo que representa perfectamente os Muíños e invita a quen a vai querer coñecer o lugar.»
Outras fotos de Sesé...
.
.
.
.
.
.
Patrimonio e vexetación
Nas fotografías de Sesé destaca a relación entre os muíños e a contorna natural. As construcións aparecen acompañadas de musgos, fentos, reflexos na auga e diferentes recunchos do bosque. A súa selección combina o patrimonio construído con detalles da vexetación que o rodea.
Fotografías realizadas con smartphone.
Lois
«Creo que esta fotografía representa moi ben o lugar, a luz mostra con naturalidade a paisaxe e o cruceiro, que encaixan en harmonía. Creo que esta fotografía mostra a beleza da natureza, e a calma e tranquilidade que se sente ao visitar este lugar.»
Outras fotos de Lois...
.
.
.
.
.
.
Atención á luz e ás texturas
Na selección de Lois ten especial importancia a luz, que atravesa a vexetación e ilumina distintos elementos da contorna. Xunto ás vistas da paisaxe e do cruceiro, aparecen detalles de follas, musgos e pequenos insectos acuáticos. Tamén incorpora fotografías da auga en movemento, explorando as diferentes formas e texturas que ofrece este elemento.
Fotografías realizadas con cámara bridge.
Un mesmo lugar, distintos xeitos de mirar
Un dos aspectos máis interesantes dun roteiro fotográfico é comprobar como un mesmo espazo pode dar lugar a imaxes e interpretacións diferentes. Cada persoa escolle aquilo que lle chama a atención, decide que quere mostrar e atopa o seu propio xeito de contalo.
A fotografía tamén nos axuda a reparar en detalles que antes nos pasaban desapercibidos e a descubrir novas formas de entender os lugares que temos preto.
Esta pequena exposición reúne catro desas miradas. Non pretende establecer cal é a mellor fotografía, senón compartir o que cada participante atopou en Golfariz e convidar a outras persoas a descubrilo tamén.
Quero dar os meus parabéns ás persoas participantes e agradecerlles a súa implicación, a súa participación nesta xornada e as achegas fotográficas que fan posible esta exposición.
Grazas por compartir as vosas miradas!
© Juan Carlos Asorey